ඔබට

ඉර හඳ ද හා තවත් තරු කැට

"කඩා දෙමි" ⁣වෙන පොරෙන්දු ද

ප්‍රියය - අමතක කරමු අපි

අප ට, අපිවම සිහින වූ කල

ඔබට

වසන්තයේ දිග පළල 

විමසයි නම් කවරෙකු හෝ 

කියමි. මම ඒ අයට 

නුඹේ සිනහව ඒ තරම් බව

ඔබට

" මේ මොහොත විඳගැන්ම"

ප්‍රේමයැයි අදහන්නේ වෙන කවුද

ප්‍රියය - ඔබ, ඔබ හැරෙන්නට

ඒ හිනාවට "ජිවිතය" කිව්වේ කවුරුද

ඔබට

කඳුළු ඇස්වලට හිනා වැහි අරන් එන 

කිනම් මායාවක් ගැවසුණිද දොතොල් මත 

ප්‍රියය - ජිවිතය දුෂ්කරයි කියා දැනුනේම 

ඔබේ මුදු හාදුවක් මා වැළද නොගත් දවසට

ඔබට

"වෙන්වෙමී" කී සැනින් "ආදරේයි" කියන ඔබ

එවිට මා නිහඬ බව තනිව ඉවසගත් ඔබ

සියුම් ඊතල හිසැති හරස් පද දරාගත් ඔබ

නොසිතුවත් ඔබ ප්‍රියය - හුස්මකට සමය මට

ඔබට

"අත හැර නොයමි" දිවුරා කියූ දින

මහද ගැස්මක යම් තිගැස්මක් විය

වෙන්ව ගිය අප මතකයක තබා රකින

ප්‍රියය - හද ගැස්ම තමයි ප්‍රේමයට තාලය

ඔබට

"ඔබට ප්‍රේමයෙනි" කියා පවසනු පිණිස 

වචන සහසක්, ලියූවෙමි කවි අතර 

 ප්‍රියය - කවි වලට වචන නැහැ දැන් 

ඔබ නැතුව "මට පාළුයි" කියන්නට